باغ نبی ﷺ دا گل عجائب کہریا سدا بہاری
|
زندہ پیر کرامت ظاہر فیض ہمیشہ جاری
|
داہ سہیل کرے بلغاراں قیمت پیندی چمدی
|
جمل جہاں دُہمی خوشبوئی جھلی واؤ کرم دی
|
شاخاں مستاں سر لٹکائے دم دم جہولن حالوں
|
ساوی جھنگی جوبن رنگی جلوہ حسن کمالوں
|
دہن پیرا دہن پیرا جس نے رزق اساڈے ٹورے
|
طوطے میناں خمرے بولن کوئل مور لٹورے
|
ہدہد کرن سجود عبادت سرپر تاج شہانے
|
بلبل بہور گلاندے باسوں پھردے مست دیوانے
|
بوزے تے کلچٹیاں سوزوں کردے کوکاں چانگاں
|
ککڑ اٹھ صباحیں دیندے ٹھپ تیمم بانگاں
|
شاہ مرداں تے مست قلندر پہیراں گج سناون
|
اٹھویں روز ہوئے نت میلا لوک زیارت آون
|
چمن خاک کریندے خدمت دعویٰ رکھ غلامی
|
پیر میرے دی دہوم چوفیرے آون ولی سلامی
|
در اسدے نت نویں سوالی پانون آس نراسے
|
جنت شان مکان منور روپ ڈہلے ہر پاسے
|
دراسدے دی خاک ملن تہیں کوڑہ فرنگ اُٹھ جاوے
|
اوتریاں نوں پتردیندا وچھڑے یار ملاوے
|
لڑ لگے دا شرم تسانوں پاک شہیدا مردا
|
رڑھے جہاز لگاوے بنے ہر مشکل حل کردا
|
جانی دشمن دوست بندے جودوکھی سومُسدے
|
جس پر تیرا سایہ پیرا اوگن سے گن اُسدے
|
بخشنہارے دی کی حاجت کجو عیب خطایاں
|
رحمت نظر تساڈی جیکر میں ہر ہووے سائیاں
|
ظاہر باطن معلم تینوں تک برائیاں جردا
|
تو ہی بخشنہارا میرا نِت ستاری کردا
|
مان تران تساڈا حضرت شرم شاہاں نوں ساری
|
میں نکاری اوگن ہاری پر تقصیر بیچاری
|
میں مسکین حوالے تیرے توں ضامن ہر کم دا
|
جو چاہیں سو لکھیں سایاں مالک لوح قلم دا
|
میں عاجز نوں نام اللہ دے ردیں نہ درگاہوں
|
ہکپل مشکل باجھ تساڈے سائے پشت پناہوں
|
تکیہ پرناں محض تساڈاناں کجھ رلا عمل دا
|
سدا محمد بخش نماناں ہلیا کرم فضل دا
|
گل میری ہتھ تیرے سایاں ساہم پیا نت تیری
|
کے مجال میری جے آکھاں انج کرو گل میری
|
کتیا ندا بھی نفر نکارا نفراں پچہے کتا
|
نہاں عزیز مصاحبی لائق در تیرے سگ سُتا
|
خیر خیرائیت بیٹھا کھانواں جیکجہہ چہاندا درتے
|
جس سر ہے دستار تساڈی میں بھی اوسدے درتے
|
سیف الملوک صفحہ 12
No comments: