رُس نہیں محبوب پیارے منیم تیرا کہیا
|
ایہہ مرد وزبانی بخشاں ہور ہزار اجیہا
|
دوہزار اجیہاں بخشاں نالے ایہہ سوالی
|
دوجا 2 قدم اٹھایا حضرت فیر کہیا رب والی
|
ترے ہزار اتے ہک ایہ بھی واصل کرساں نوروں
|
تریجا قدم مبارک چایا آیا حکم حضوروں
|
اوہ سارے جد قطب بنائے پیر پڑھے شکرانے
|
تیرا کہیا کدے نہ موڑاں اے محبوب یگانے
|
آس تُساڈی رکھاں
میں بھی اوگنہارنا چیزا
|
ایسی عزت خاطر تیری رب دے خاص عزیزا
|
سخی دوار تساڈے اتے میں کنگال سوالی
|
سیوا دار تساڈا حضرت کوئی نرہیا خالی
|
دین دواں سبہو ہتھ تیرے کوئی نہ ٹھاکے ہوڑے
|
لکھاں خیر تساڈے لیندے بن منگوں بن لوڑے
|
ہکو آس تساڈے دردی ناں کوئی ہور پناہاں
|
میں پاپی شرمندہ جھوٹھابھریانال گناہاں
|
دھکے دیون والے بہتے توں ہتھ پکڑن والا
|
میں انہاں تے تلکن رستہ کیونکر رہے سنبہالا
|
گھمن گھیراندر منتارو لگ نہ سکا تر کے
|
توں پکڑیں تاں کوئی نہ دھکے پہنچ شتابی کرکے
|
تکدا لوک تماشے حضرت میں بیحال پیاہاں
|
تلک تلک کے منہ سر بھریا گندی گلی گیاہاں
|
یامیراں کی حال بندیدا جے تدہ سار نہ لیتی
|
پاک نہیں ہتھ پکڑ اٹہاندے بھریوس نال پلیتی
|
جس در جانواں دھکے کہانواں ہک تیرا در تکا
|
چوراں توں قطب بنایا میں بھی چور اچکا
|
بیکساں دا والی توہیں شرم دتی رب تینوں
|
سن فریاد پیراندے پیرا دھکا دئییں نہ مینوں
|
عرض کرندے لائق شاہا سخن نہ میں تہیں سردا
|
آپ مہارے پچھے پیاں سٹ نہ جائیں مردا
|
منہ میرا کد عرضاں لائق ناقص عقل بیچارا
|
عرض کراں شرمندہ تہیواں کے میں کراں ککارا
|
رکھو قدم میرے سر حضرت سدا سکہالا تہیواں
|
مت کوئی سخن اَن بھاناں نکلے عاجز مفت مریواں
|
شاہ مقیم محمد پچھے پاک جمال دکھاؤ
|
بچیاندا سر صدقہ میں ول نظر کرم دی پاؤ
|
میں بھی جاناں اوگن ہارا لائق نہیں جمالاں
تینوں سبہ توفیقاں حضرت نیک کرو بد حالاں
|
|
سیف الملوک صفحہ 10
