|
ناںپڑہیا ناں سنیا ڈٹھا قبض میری وچہ ناہیں |
مجلس میری وچہ نہ ہویا اس دا ذکر کداہیں |
|
صاحب یمن کرامت والا چہرہ خوب نورانی |
پر ہک بڈہا خضر نمونہ عمراں دا سیلانی |
|
جھگی پاء کنارے بیٹھا رب ول چت لگایا |
سبہ ملکان وچہ سیر کریندا ملک میرے ہن آیا |
|
کرے عبادت دن تے راتیں نال ارادہ جھُک کے |
آمدرفت خلق دی کولوں بیٹھا ہے چھپ لُک کے |
|
حال حقیقت مطلب والی اسنوں آکھ سناؤ |
متے مراد کریگا حاصل خدمت اسدی جاؤ |
|
اوس بزرگ دے ڈیرے آیا اویوں نیواں اڑیا |
سنکے حسن زبانی شاہ دی لے رخصت اٹھ ٹریا |
|
پیر تروٹھا آکہن لگا مطلب دس تمامی |
اگے رکھ نیاز شیرینی نیونکے ہویا سلامی |
|
اوکھے ویلے باہوڑ پیرا تیری نہ ہن کمائی |
گل حسن میمندی اپنی ساری کھول سنائی |
|
حل کرو ایہ مشکل میری جیؤں جانوں ہر لیکھے |
اندر تیرا شیشہ روشن سبہ جگ تائیں ویکھے |
|
مشکل حل مراداں حاصل کرئیے شکر خدائی |
ہادی راہنما اسانوں کراج راہ نمائی |
|
ڈہو نڈ کرو تاں مطلب پاؤ خیر پتہ میں دسناں |
بڈھے مرد پئی دل شفقت کہندا سن توں حسناں |
|
باغ بازار مکان تکیندا بہتے روز رہیاساں |
میں ہک واری سیر کریندا شہر دمشق گیا ساں |
|
اخباراں دے علم کلاموں ذکر کھلا سرکارے |
ونج بیٹھا ساں ہکس دھاڑے بادشاہی دربارے |
|
ہمت کرو محمد بخشا سفروں
سُود لیجاؤ |
اوس شاہے دی خدمت جاؤ تاں مت مطلب پاؤ |
|
اوسے مرشد کامل اگے عرضاں کرکر رویا |
حسن ایہ خبر مبارک سنکے بہت دلوں خوش ہویا |
|
مِہر کریندے لائق ڈٹہیوس خاصہ مرد یقینی |
رحم پیا دل پیر سچے دے ویکہہ اوہدی مسکینی |
|
جیہڑا پاک غروروں خالی سو پُر کردے نوروں |
ولی اللہ دے بھانڈا تک کے پاندے خیر حضوروں |
|
نقد نصیب محمد بخشا بِن قسمت کی داروں |
جنہاں پیسہ پلے ناہیں خالی مڑن بازاروں |
|
ڈیرے سنے پلک وچہ اسنوں شہر دمشق پہنچایا |
میٹ اکھیں فرمایا پیرے حسن بجا لیایا |
|
مقولہ شاعر |
|
|
مرداندے در ٹہندے ناہیں شامت تد مریندی |
آہو ہمت مرداں والی ایہو کم کریندی |
سیف الملوک صفحہ 17
No comments: