|
دولت خلعت بخش تمامی عزت نال ودہائے |
رکھ اوڈیک نچلا بیٹھا جلد نویس سدائے |
|
خوشخط بہت صحیح شتابی استا کار رقم دے |
سیکڑیاں تھیں دو چن کڈہےماہر دھنی قلم دے |
|
جاں رمضان مبارک اندر شاہ کتاب سنائے |
دے دولت وڈیائی خلعت ایہ صلاح پکائے |
|
قصہ سیف الملوکے والا لکھ لیناں کر جلدی |
تُساں دوہاں چھپ بہناں چو ری خاطر ایسے گلدی |
|
توڑے جلد پڑہے کوئی کیسا لکھ صحیح لہاں گے |
قانونگو تسلی دیندے کانی پکڑ بہاں گے |
|
قانونگو کیتے مُڑ تکڑے دے کاغذ سمیانہ |
جاں رمضان مبارک آیا حسن کیتا شکرانہ |
|
ہک حسن میمندی سدیا دو تِن ہور دیوانہ |
زبدۃالجواب کھلائی ہویا حکم شہانہ |
|
آپ حضور شہانے بیٹھا وقت مبارک آئے |
قانونگو حسن نے چوری پڑدے وچہ بہائے |
|
سُن سُن کنبےرکھ چمن دے لے حالت دا حصہ |
جاں سلطان دمشق شہر دا پڑہن لگا ایہ قصہ |
|
اول آخر تیک قصے دے حرف صحیح اُتارے |
ثابت ہوش رہے وچہ پڑدے قانونگو قرارے |
|
رخصت لین لگا درباروں فوج وطن نوں ٹوری |
جاں قصہ لکھواحسن نے قابو کیتا چوری |
|
خلعت تخفے ہدئیے دتے جے کجہ آہے سردے |
اوٹھ حسن نوں رخصت کیتا شاہ دمشق شہردے |
|
مہلت اجے نہ مکی آہی آن دنی اُس ڈالی |
قصہ گھن وطن نوں ٹریاں نال خوشی خوشحالی |
|
اوہ حسن میمندی کیتا افسر وچہ وزیراں |
بہت انعام دتے سلطانے خلعت ملک جگیراں |
|
جے کوئی رنج مصیبت جہاگے کدے تکے خوشحالی |
ایس قصہ دے پچھے ہویا رتبہ اسدا عالی |
|
مقولہ شاعر |
|
|
ہمت نال لگے جس لوڑے پائے باجھ نا مردا |
مردا ہمت ہار نہ مولے مت کوئی کہے نہ مردا |
|
ڈہونڈہ کرن تہیں ہٹیں ناہیں ہٹ گیوں تاں ہاسا |
جاں تک سانس نراس نہ ہونویں ساس ٹٹے مڑ آسا |
|
بھکہا منگن چڑہے محمد اورک بھردا کاسا |
جھل جھل ہار نہ ہاریں ہمت ہکدن پھرسی پاسا |
|
یاد نہ رہے قضیہ کوئی جدوں فراغت تہیندی |
جہاں مقصود میسر ہوندا رنجوں راحت تھیندی |
|
جدوں فراغت کار دن ہوندی پڑھ پڑھ لیندے حصہ |
بہت پسند کیتا سلطانے ایہ مبارک قصہ |
سیف الملوک صفحہ 19
No comments: