سیف الملوک صفحہ 20

ناں دل اکے جیبھ نہ تھکے ایہو کار قبولی	چھٹیوس ہور کتاباں قصے اسے دی مشغولی
اس قصے وچہ ہین عجائب دانش تے تدبیراں	دائم درد ہویا سلاطانے پڑھدا سنے وزیراں
ایہہ قصہ پڑھ بھانبڑ بندا نال ربے دی یاری	جس وال اندر ہووے بھائی یک رتی چنگاری
اس قصے نوں پڑھدا رہیا خاصے نال دہیانے	جاں جاں تیک حیاتی آہی اس عادل سلطانی
شالہ درد محبت والے پڑھ سن ہون دیوانے	اوسے تہیں ایہ ظاہر ہویا پھریا وچہ زمانے
دربیان اوصاف قصہ مذکور و اوصاف شعر و کلام گوئد و التماس پیش دانایاں ایں فن شریف
نالے امر ہویا سی صادر مشد دے درباروں	میں بی بات عجائب دٹھی فارسیوں اخباراں
چوہاں کتاباں دی تک شاہدی ہک ہندی کر جوڑی	ملکاں تہیں منگوا کتاباں بات تمامی لوڑی
پاوے رب قبول محمد مرداں دی درگاہے	اس ہندی وچہ مطلب بہتے جیہا جیہا کوئی چاہے
سننے والےپاون ایتہوں خواہش جنہاں کماندی	ہر ہر قسم خوشی دی اس وچہ ہر ہر قوم غماں دی
نالے درد وچہوڑے بہتے نالے خوشی وصل دی	بہتی ہے تعریف حسن دی ہاسی بری شکل دی
عیش خوشی دے ساجے باجے درد دکہاندے چالے	آدمیاں دے راہ طریقے جن پریاں دے نالے
بخل سخاوت ظلم عدالت غفلت سرت سنبھالے	بادشاہی تدبیراں گہنیاں دولت فوج مثالے
روہڑناں ترناں اڈناں ڈہیناں ذکر ایتھےہر گل دے	جوش خروش ندی دے بہتے ٹاپو سیر جنگل دے
دیسوں دیس عجائب اسوچہ کیا بھورے کیا کہیسوں	عاجزیاں بیکساں گہنیاں حالت دیس بدیسوں
کلر شور بغیچے نالے میوے تے پھلواڑاں	کوہ قافاندے پتے نشانی غاراں شہر اجاڑاں
سوک وہاہ محمد بخشا ہر گل اس وچہ آئی	شیر شکار اتے بند قیداں نالے صلح لڑائی
خوف امید محمد بخشا اس وچہ گھنی گہنیری	رستم وستی حال شکستی دہشت بھاج دلیری
سفرالعشق کتاب بنائی سیف چھپی وچہ لاٹھی	بات مجازی رمز حقانی ون وناں دی کاٹھی
جنہاں جاگ عشق دی سینے جاگ سویرے روسن	جنہاں طلب قصے دی ہوسی سن قصہ خوش ہوسن